'निजीलाई फस्टाउन यसरी खस्काइदैछ वीरलाई'

काठमाडौ, श्रावण १३ - वीर अस्पताललाई सही ढंगले सञ्चालन गर्न सकिए राजधानीका आधा जति निजी अस्पताल धराशायी बन्ने त्यहाँ कार्यरत चिकित्सकहरूले बताएका छन् ।  वीरको क्षमता, संरचनालाई बलियो बनाउनुको साटो जानाजान खस्काइएको आरोप समेत उनीहरुले लगाए ।   

'वीरलाइ राम्ररी सञ्चालन गर्ने हो भने राजधानीको ५० प्रतिसत निजी अस्पतालको व्यापार सुक्छ,' रेजिडेन्ट एसोसिएसन अफ नाम्सका अध्यक्ष डा. मंगल रावलले भने, 'सुनियोजित ढंगले वीरलाई तहसनहस पारिँदैछ ।'

एक तथ्यांकअनुसार तीन वर्षयता वीरमा करिब २५ प्रतिशत बिरामी आउन छाडिसकेका छन् । उपचारमा आएकाहरूमा या त अति गरिब छन्, जसको संख्या करिब ८० प्रतिशत छ । त्यस्तै अति नै माथिल्लो स्तरको बिरामी मात्र उपचारमा वीर आउने गरेको छ । 'वीरमा एक दशकअघि जे सेवा थियो, घटो छ वा अब छैन,' अस्पतालका एक वरिष्ठ चिकित्सकले भने, 'गत ६/७ वर्षयता अस्थिर सरकारका कारण पनि वीरको  स्थिति बिग्रियो ।'

गठबन्धन सरकारहरूबाट भागबन्डाका आधारमा अस्पतालमा पदाधिकारी नियुक्ति हुने क्रम चलेपछि त समस्या थप बल्भिmएको हो । अझ त्यो रोकिएको छैन । 'यहाँ राम्रो हैन, हाम्रो मान्छे चाहिएको छ, यसैले महिनौंसम्म वीरका उपकुलपतिलगायतका पदाधिकारी नियुक्त हुन नसकेको हो,' ती चिकित्सकले थपे, 'यहाँका कर्मचारीतन्त्रमा राजनीति यस्तो गाँसियो कि उहाँहरू स्वाथ्यकर्मी कम, पार्टी कार्यकर्ता बढी हुनु भयो ।'

वीरमा कार्यरत एवं काम गरिसकेका केही वरिष्ठ चिकित्सकहरू समेत अस्पतालको स्थिति खस्काउन धेरै सहयोग गरिरहेको दाबी डा. रावलको छ । उनी भन्छन्, 'यहाँ ४ हजारमा हुने शल्यक्रिया निजी क्षेत्रमा एक लाख रुपैयाँ खर्चिनुपर्छ ।' मेरुदण्डको शल्यक्रिया गर्दा निजी क्षेत्रमा ७० हजारभन्दा बढी शुल्क तिर्नुपर्ने भए पनि वीरमा भने शल्यक्रियाको शुल्क छैन । 'वीर बलियो भयो भने न्युरो, अर्थोपेडिकलगायतका सेवा बिरामीले सस्तोमा पाउँछन्, निजी क्षेत्रमा दुई लाखमा यी सेवा उपलब्ध हुन्छ' डा.रावलले भने, 'वीरमा यी सेवाका लागि १० हजार रुपैयाँ भए पुग्छ ।'

वीरको आईसीयू सेवालाई समेत राम्ररी सञ्चालन नगरेर निजी क्षेत्रलाई सघाउने गरिएको दाबी अर्का एक चिकित्सकको छ । 'निजी क्षेत्रका केही आईसीयू सञ्चालन गर्ने अस्पतालका सञ्चालनले बिरामी रेफर गर्नेलाई तीन हजार र बिरामी एम्बुलेन्सका चालकलाई एक हजार रुपैयाँ दिने गरेको तथ्य लुकेको छैन,' ती चिकित्सकले भने । ती चिकित्सकका अनुसार वीरमा आईसीयू शुल्क तीन हजार रुपैयाँ लागे पनि बाहिर भने १० हजारसम्म पर्छ । निजी स्वाथ्य निकायलाई पोस्न वीरलाई ट्रलि बस, साझा यातायात, नेपाल एयरलाइन्सजस्तो स्थितिमा पुर्‍याउन खोजिएको आरोपसमेत डा. रावलको छ ।