युरोपमा मानव तस्करको फन्दामा नेपाली

 अवैध बाटो हुँदै अमेरिका पुग्ने लोभमा धेरै नेपालीले मेक्सिको तथा ग्वाटेमालामा बन्दी जीवन बिताइरहेका छन् ।
केही चेलीहरु अफ्रिकामा नारकीय जीवन बिताउन बाध्य भैरहेका छन् । अफ्रिकाका विभिन्न विश्वविद्यालयमा अध्ययनका लागि पुगेका विद्यार्थीहरुले पनि सास्ती खेपिरहेका छन् ।
अमेरिका र अफ्रिका एउटा उदारहण मात्र हो । बाहिर त्यति सार्वजनिक नभएपनि युरोपमा दलालमार्फत पुग्ने नेपालीहरुले पाएको सास्ती पनि उत्तिकै दर्दनाक नै छ । युरोप छिर्ने क्रममा रोमनिया र हंगेरीको सिमानामा समातिएका केही नेपाली विगतमा जेल जीवन बिताएर स्वदेश फर्किसकेका छन् ।
खकुलो नीतिका कारण युरोप छिरेकाहरु वैधानिक बन्न पोर्चुगल जाने क्रम बढ्न थालेको छ । विषेशत बेल्जियम, स्पेन, नेदरल्याण्डस् र फ्रान्सको तुलनामा शरण लिन नपर्ने हुनाले पनि त्यता चाप बढेको हो ।
विभिन्न कार्यक्रमका लागि भनेर नाम चलेका संस्थाहरुले नेपालीहरु युरोप पुर्‍याउने गर्छन् । केही दिनअघि मात्र बेल्जियममा च्यारिटी सो को लागि भनेर कलाकारहरुसँग आएका थप १७ जना फर्केनन् । त्यस्तै गरेर एसेन्टा २०१३ मा पनि धेरै व्यक्तिहरु बेल्जियम छिरेर यतै बसेको तथ्य सार्वजनिक भैसकेको छ ।
अहिलेको समयमा युरोप छिर्ने सबैले १० देखि १५ लाख रुपैयाँसम्म दलाललाई बुझाउने गर्छन् । तर उनीहरुले तिरेको मोटो रकम ३/४ वर्षसम्म पनि उठ्न हम्मे पर्ने गर्छ । वैधानिक हुने/नहुने त्यो पनि निश्चित हुँदैन । भैहाले पनि उनीहरुको लगानीले डाँडा काटिसकेको हुन्छ । युरोपको कुनै पनि देशमा वैधानिक काम पाइहालेमा आफ्नो दैनिक गुजारा चलाउनमै ठिक्क हुने गर्छ ।
विभिन्न माध्यमबाट कार्यक्रमको लागि भनेर पुग्नेहरु फर्के वा फर्केनन् भन्ने कुरा न त सम्बन्धित देशले नै वास्ता गर्छ, न त नेपाल सरकारले नै । नाम चलेका संस्थाहरु गरिखाने भाँडो भएका छन् । नेपाली कलाकारहरुलाई पनि प्रयोग गरिएका छन् ।
युरोपमा नेपाल प्रवद्र्धनका नाममा हुने विभिन्न व्यवसायिक कार्यक्रमहरु मानव तस्करीको दह्रो माध्यम भएका छन् । खाडी मुलुकमा गएर दुःख पाउने नेपालीको जस्तै पीडा युरोपमा नेपालीहरुले भोगिरहेका छन् ।
युरोपको आर्थिक मन्दीको अवस्थामा मोटो रकम खर्चेर जानेहरुका लागि केही कडा नियम नेपाल सरकारबाट हुनु जरुरी छ । यतिका धेरै रकम नेपालमै खर्च गरेर केही इलम गर्न सकेको खण्डमा बरु आउनेहरुलाई नै फाइदा पुग्ने देखिन्छ । अर्कोतर्फ यसरी ल्याउने व्यक्तिहरुलाई पनि कानुनी कार्वाहीको दायराभित्र ल्याउनु आजको आवश्यकता छ ।
तसर्थ ठूलाठूला सपनाहरु बुनेर अहिलेको अवस्थामा युरोप छिर्न खोज्नु मुर्खता नै हो । यहाँ सोचे जस्तो सहज छैन । निकै कठिन छ, यहाँको अवैधानिक जिन्दगी । वैधानिक हुने योजनाका साथ वर्षौंसम्म यतै बस्न खोज्नेहरुको आफ्नै समस्या छ ।
युरोपका देशहरुमा दिन प्रतिदिन नियम कानुन कडा बनाउँदै लगिएका छन् । अझै नयाँ आगन्तुक शरण लिनेहरुलाई त फलामको चिउरा चपाउनु सरह नै छ, युरोपियन जिन्दगी ।
युरोपियन देशहरुमा विभिन्न माध्यमबाट हुने मानव तस्करका गतिविधिलाई रोक्न नेपाल सरकार चनाखो हुन जरुरी छ ।
विभिन्न कार्यक्रमका लागि भनेर यता आएका व्यक्ति स्वदेश फर्कन्छन् वा फर्कँदैनन्, त्यसको कडा निगरानी हुन आवश्यक छ । अन्यथा कुनै दिन देशको इज्जत नेपाली तस्कर दलालहरुले माटोमा नमिलाउलान् भन्न सकिँदैन ।