मुन्टो हल्लाएर पन्छिए रेग्मी !

न्युयोर्क, आश्विन १४ - कार्यक्रमलाई अन्तरक्रियाको नाम दिइएको थियो । उपस्थिति उल्लेखीय नभएपनि धेरै जसोहरु प्रश्नहरुको फेहरिस्त लिएर गएका थिए । तर, त्यसको ठिक उल्टो, मन्त्रिपरिषदका अध्यक्ष खिलराज रेग्मी भने लिखित भाषण लिएर उपस्थिति भएदिए ।

सहभागीहरुले प्रश्नहरु ओइराए, तर रेग्मीले कहिले मुन्टो हल्लाउँदै, कहिले गालामा हात राख्दै, अनि मौन रहँदै जिज्ञाशाहरुको बेवास्ता गर्दै गए । समयको पाउबन्दी भन्दै लिखित मन्तव्य दिएर रेग्मी फुत्किन खोजेका थिए । तर प्रश्नहरु आइरो लागिहाले । 

आदिवासी जनजाति महासंघ अमेरिका र उसका सहयोगी संस्थाहरुले आयोजना गरेको सो अन्तरक्रियाको सुरुवातमै आयोजक मध्येकी एक परिता राजभण्डारीले पहिलो पटक संविधान बनाउने नसक्ने असफल पार्टीहरुका नेताहरुले पाठ सिकुन् भन्दै कविता पाठ गर्दा, त्यसलाई समर्थन गरेझैं रेग्मी मुन्टो हल्लाउँदै थिए ।

अर्का एक वक्ताले भने' प्रवासीहरुको चापलाई मध्यनजर गर्दै सरकारले छुट्टै न्युयोर्कमा काउन्सुलर अफिस खोल्नु पर्छ ।' शायद कुरो, मन्त्रिपरिषद अध्यक्ष रेग्मीका लागि चित्त बुझेको हुनुपर्छ, मनले खाए झैं उनले राम्रै सँग टाउको हल्लाए । आयोजक संस्थाका अध्यक्ष विनोद पोमु र राष्ट्र संघका लागि नेपाली प्रतिनिधि दुर्गा भट्टराईको बीचमा बसेका रेग्मी पटक पटक भट्टराईसँग कानेखुशी गर्थे ।

धेरै जसो समय मलिन देखिएका रेग्मीलाई सहभागीहरुको प्रश्नहरुले अप्ठारो पारेको जस्तो देखिए पनि उनी सजिलै पन्छिन्थ्ये ।  मधेस मुलका एक अर्का सहभागीले ठाडै सोधे'तपाई संघीयताको पक्ष वा विपक्षमा ? संघीयताले देश जोडछ् कि फुटछ् ?' प्रतिउत्तरमा रेग्मीले भने 'संविधान सभाको निर्वाचन पछिको स्थितिलाई मैले आंकलन नगरौं र अभिब्यक्ति नदिउँ ।' सहभागीहरुले फेरि भाँझो हाले, 'एउटै ब्यक्ति मुलुकका दुई महत्त्पूर्ण पदमा बस्न तपाईंको नैतिकताले दिन्छ् ?'

आफू कसरी, किन मन्त्रिपरिषदको अध्यक्ष बन्ने बिषयमा उनले पुरानै भनाइ दोर्‍याए  भने 'पद, मैले चाहेको होइन्, परिस्थितिबाट सिर्जना भएको हो ।' शक्ति पृथकिकरणबारे उनको आफनै तर्क थियो 'म शक्ति पृथकीकरणलाई सम्मान गर्ने ब्यक्ति हुँ । दुई पदमा आसिन भए पनि म अहिले न्याय क्षेत्रमा सक्रिय छैन् ।' उनको प्रतिप्रश्न थियो,'यो अवस्था कसरी शक्ति पृथकीकरण विपरीत भयो ?'

रेग्मीलाई सेना परिचालन र वैद्य समूहको बहिष्कारको सम्बन्धमा प्रश्न गरिँदा उनले सेना परिचालन कसैविरुद्व नभएर चुनावको सुनिश्चितताका लागि भएको दाबी गरे । आफ्नो राजीनामाको मागको बिषयलाई अप्रत्यक्ष रुपमा सम्बोधन गरेका रेग्मीको भनाइ थियो,'एउटै कुरालाई बारम्बार उठाएर घुर्कि लगाउँदैमा चुनाव रोकिँदैन् ।' भारतीय प्रधानमन्त्री मनमोहन सिंहलाई भेटवार्ता गरेको केहि घण्टापछि आयोजित कार्यक्रममा बोल्दै भने,' ८० प्रतिशतले भाग लिएपछि, अरुले के गर्छन्, त्यसले अर्थ खासै अर्थ राख्दैन ।'