नेपाल बारेको फिल्म उत्कृष्ट सूचीमा

काठमाडौ, पुस १४ - नेपालमा खिचिएको एक चलचित्रलाई बीबीसीले सन् २०१३ को उत्कृष्ट सूचीमा राखेको छ । बीबीसीका फिल्म समीक्षक टम ब्रुकले तयार पारेको उत्कृष्ट १० को सूचीमा नेपालमा खिचिएको फिल्म मनकामनालाई उत्कृष्ट ठहराइएको हो । ब्रुकले तयार पारेको सूचीमा मनकामनालाई छैठौं नम्बरमा राखिएको छ । गोरखा जिल्लामा पर्ने प्रसिद्ध मनकामना दर्शनका लागि केबुलकार चढेर जाने एक तीर्थयात्री समूहमाथि फिल्म बनेको छ । स्टेफिन स्प्रे र पाचो भेलेजले निर्देशन गरेको फिल्मले नेपाली तीर्थयात्रुको भिन्न भिन्न मनोदशा व्यक्त गर्ने फिल्लम एक घण्टा ५८ मिनेटको छ । स्वीजरल्याण्डको लोकार्नो फिल्म फेस्टिभल, क्यानडाको टोरेन्टो फिल्म फेस्टिभल, अमेरिकाको न्यूयोर्क फिल्म फेस्टिभल र एएफआई फेस्टमा प्रदर्शित फिल्मले समीक्षकबाट प्रशंसा पाएको थियो । सन् २०१४ फेब्रुअरीमा हुने ओस्कार अवार्ड समारोहमा पूर्वसन्ध्यामा बीबीसीको यो सूची सार्वजनिक भएको हो । सूचीमा सन् १८४० दशकताका वेलायतमा रहेको दासताबारे निर्मित चलचित्र टुवेल्भ ईयर्स अ स्लेभलाई एक नम्बरमा राखिएको छ । कम्प्युटरले निर्माण गरेको महिला स्वरमा लठ्ठ हुने पुरुष पात्रको चरित्रमा निर्मित अमेरिकी फिल्म 'हर' लाई सूचीको दोस्रो स्थानमा राखिएको छ । सन् २०१३ मा निर्माण गरिएको थि्रलर फिल्म ग्राभिटी सूचीको तेस्रो स्थानमा छ ।